كتب الشيخ ربيع قبيسي على صفحته (الفيسبوك)
اليوم مش عارف شو بدي إحكي أو أكتب ..
دموعنا ما عم توقف على ناس منعرفهم وحتى ما منعرفهم ..
كل يوم صورة شاب وصبية، بي وأم وخي وأخت وقريب وصديق عم ننعيهم كانوا ضحايا كورونا اللئيمة ..
كل يوم عم يخسر وطننا لبنان شباب وشابات وآباء وأمهات ..
عم نخسر المستقبل الحلو اللي عليه الأمل والتغيير ..
عم إبكي كل يوم من قلبي على أخبار الموت ع كبير كسر قلوب عيلته و ع أم خسروها أولادها وخسروا حنانها وريحة الجنة فيها، كتار راحوا بدون إستئذان ..
كلنا دموعنا عم تسبقنا وقلوبنا محروقة ، لأننا تعبنا كتير ..
يا رب دخلك ألطف فينا وبكل هالناس عطينا القوة حتى نقضي على وباء ومرض ما عم يخلي أيامنا حلوة ..
حرمنا نضحك سرق منا الأمان والاطمئنان .. حرمنا نشوف أهلنا وأحبابنا سرق الجمعات الحلوة والقعدات الأنيسة ..
عنجد شي ببكي يا إخواتي
كتير غريب هالزمن بيتوفى عزيز ما منقدر نشوفه وإذا انصاب حدا غالي ما فينا نكون حدو ما منقدر نمسح ع وجعو .. نقويه .. ما منقدر نحسسوا بالأمان نحن حدك ومعك !!
شو تغيّر نظام حياتنا وإجتماعياتنا !!
كنا نواسي بعض صرنا نبكي على بعض ، كنا نوقف حد بعض صرنا نخاف نعدي بعض !!
يا رب لطفك ورضاك
يا رب رحمتك حتى تشمل كل إنسان مصاب بالعافية وتصبر كل قلب عم يبكي على فقد حبيب وعزيز
يا رب اشملنا بالعفو والرحمة واللطف
اجعل بلادنا آمنة سليمة .. رجّع الأيام الحلوة اللي ما كنا عارفين قيمتها حتى صار فينا هيك وصرنا نعرف قيمة كل شي كان عنا !!
يَٰٓأَيُّهَا ٱلْعَزِيزُ مَسَّنَا وَأَهْلَنَا ٱلضُّرُّ وَجِئْنَا بِبِضَٰعَةٍۢ مُّزْجَاةٍۢ فَأَوْفِ لَنَا ٱلْكَيْلَ وَتَصَدَّقْ عَلَيْنَآ ۖ إِنَّ ٱللَّهَ يَجْزِى ٱلْمُتَصَدِّقِين
#يا_رب
#كورونا
#بيتك_أملك
زمن الكورونا ٢٨/١/٢٠٢١
